Á fundi sem öllum kjörnum fulltrúum þeirra sveitarfélaga sem mynda eigendahóp SORPU bs. var boðið á og haldinn var í dag, kynnti stjórn fyrirtækisins erfiða fjárhagsstöðu þess og fyrirhugaðar aðgerðir til að bregðast við henni. Aðgerðum þessum er ætlað að fela í sér heildarendurskoðun á rekstri og fjármögnun fyrirtækisins, en áætlanir þar að lútandi skulu liggja fyrir í júní næstkomandi. Til að bregðast við fyrirsjáanlegum lausafjárvanda SORPU bs. og skapa ráðrúm til endurskipulagningar mun stjórnin jafnframt fara þess á leit við sveitarfélögin sem að fyrirtækinu standa að þau ábyrgist 600 milljóna króna lánalínu sem sótt verður til viðskiptabanka félagsins.

Stjórn SORPU bs. fól nýverið Innri endurskoðun Reykjavíkurborgar að gera úttekt á stjórnháttum og áætlanagerð í tengslum við yfirstandandi framkvæmdir við byggingu gas- og jarðgerðarstöðvar fyrirtæksins. Niðurstaða þeirrar vinnu leiddi m.a. í ljós verulegt vanmat á kostnaði og alvarlega hnökra á upplýsingagjöf til stjórnar fyrirtækisins. Á grundvelli þessarar skýrslu og aðstæðna í rekstri fyrirtækisins var þáverandi framkvæmdastjóra SORPU bs. sagt upp störfum og Helgi Þór Ingason ráðinn tímabundið til að gegna starfinu og leiða endurskipulagningu á rekstri og fjármögnun fyrirtækisins.

Frekari skoðun sérfræðinga sem unnið hafa að greiningu á fjárhag fyrirtækisins á vegum stjórnar þess hefur dregið fram uppsafnaðan fjármögnunarvanda vegna yfirstandandi stórframkvæmda sem stjórn hafði ekki áður verið kunnugt um. Jafnframt liggur fyrir að tekjur fyrirtækisins hafa dregist hraðar saman en gert var ráð fyrir í áætlunum þess.

Á fundinum í dag kom fram að í ljósi fram kominna upplýsinga muni stjórn SSH skipa sérstakan starfshóp sem ætlað er að gera ítarlega úttekt á fjármálum, stjórnsýslu og verkefnastjórnun SORPU bs. til að skýra ástæður þeirrar stöðu sem upp er komin.  Óskað verður eftir því að vinnu við þessa úttekt verði hraðað svo sem kostur er.

Rósa Guðbjartsdóttir, formaður SSH , segir að stuðningur sé við þær aðgerðir sem hafa verið kortlagðar á vegum stjórnar SORPU bs. og ætlað er að skjóta stoðum undir rekstur fyrirtækisins til framtíðar. Undan því verði hinsvegar ekki vikist að draga fram ástæður þess vanda sem upp er kominn. Sú skoðun verði mikilvægur þáttur í heildarendurskoðun á rekstrarformi byggðasamlaga sem stendur yfir.

Nánari upplýsingar veitir Helgi Þór Ingason