Umhverfisskýrsla SORPU, grænt bókhald, fyrir árið 2019 er komin út. Í skýrslunni er fjallað um niðurstöður umhverfisbókhalds SORPU, s.s. notkun hráefna í starfseminni, orku- og vatnsnotkun, eldsneytisnotkun og fleira. Einnig er fjallað um loftslagsmarkmið SORPU og þau verkefni sem farið var í á árinu til að draga úr útblæstri gróðurhúsalofttegunda frá starfseminni. Umhverfisskýrslan er hluti af ársskýrslu SORPU en hún er væntanleg í heild sinni í byrjun sumars.

Helstu niðurstöður

Heildarúrgangsmagn sem móttekið var hjá SORPU árið 2019 dróst saman um 14,6% frá fyrra ári og var alls tekið við 224.756 tonnum.

Endurnýtingarhlutfall úrgangs var 49,6%.

Árið 2019 heimsóttu 3.484 einstaklingar á öllum aldri SORPU til að fræðast um starfsemi fyrirtækisins og umhverfissjónarmið við flokkun og með­höndlun úrgangs.

Losun gróðurhúsalofttegunda vegna flutn­ing­a og aksturs með úrgang á vegum SORPU dróst saman og var heildarlosun CO ₂ vegna eldsneytisnotkunar um 1.325 tonn (1.690 tonn 2018). Losunin dregst saman um hálft kg CO ₂ á hvert meðhöndlað tonn úrgangs hjá fyrirtækinu.

Fleiri áhugaverðar niðurstöður má kynna sér í skýrslunni .