Heildarmagn úrgangs sem barst til SORPU fyrstu tvo mánuði ársins dróst saman um 27% miðað við sama tímabil í fyrra. Ástandið í þjóðfélaginu endurspeglast að einhverju leyti í ruslinu okkar og samdráttur í magni úrgangs er vísbending um að hægt hafi á hjólum atvinnulífsins. Áhrifin af verkfalli starfsfólks sorphirðunnar í Reykjavík voru augljós og birtust í minna magni blandaðs úrgangs, pappírsefna og plasts í móttökustöðinni í Gufunesi.

Á meðan á verkfallinu stóð nýttu íbúar sér grenndargáma fyrir úrgang í auknum mæli en um 19% meira magn barst í þá af flokkuðum pappír, plasti og gleri, enda voru pappírs- og plasttunnur ekki losaðar hjá íbúum í Reykjavík á meðan á verkfallinu stóð. Það náði þó ekki að vega nema að litlu leyti á móti samdrætti í úrgangsmagni því í heildina dróst magnið sem barst í móttökustöðina í Gufunesi saman um 17% milli ára.

Magn úrgangs sem barst á endurvinnslustöðvar SORPU, sem eru sex talsins, stóð nokkurn veginn í stað miðað við sama tímabil í fyrra. Ekki var því að sjá að íbúar færu með úrgang sinn í neinum mæli á endurvinnslustöðvarnar þegar ruslatunnur yfirfylltust. Upplifun starfsmanna var þó að aukin umferð hafi verið um stöðvarnar á meðan á verkfallinu stóð.

Íbúar endurnýja síður húsbúnað

Svo virðist sem íbúar hafi dregið úr endurnýjun húsbúnaðar að undanförnu þar sem 25% minna magn barst í nytjagáma Góða hirðisins á fyrstu tveimur mánuðum ársins miðað við sama tímabil í fyrra. Þar spilar þó einnig inn í að starfsfólk Góða hirðisins fylgist betur með gámunum en áður og sérstök áhersla hefur verið lögð á að draga úr þeirri sóun sem fylgir flutningum á óseljanlegum vörum frá endurvinnslustöðvum í Góða hirðinn.

Það verður áhugavert að rýna í magntölur marsmánaðar og sjá hver áhrifin verða af aðgerðum vegna Covid-19 veirunnar og hvort sorphirða í Reykjavík, sem nú er hafin aftur eftir verkfall, vegi eitthvað upp á móti þeim áhrifum.