Góði hirðirinn flytur í gömlu Kassagerðina

Góði hirðirinn flytur í gömlu Kassagerðina við Köllunarklettsveg 1. Stefnt er að flutningum þann 1. janúar á næsta ári. Góði hirðirinn hefur vaxið mikið undanfarin ár með aukinni áherslu á endurnotkun og minni sóun.

Núverandi húsnæði Góða hirðisins við Fellsmúla hefur gagnast versluninni vel undanfarin ár. Vegna mikils vaxtar í umsvifum þarf verslunin nýtt og stærra húsnæði og flytur því í tvöfalt stærra rými við Köllunarklettsveg. Núverandi húsnæði takmarkar getu Góða hirðisins til frekari vaxtar og til að taka á móti og selja alla þá nytjahluti sem til hans berast. Stærra húsnæði mun því auka endurnot á nytjahlutum og styður við markmið SORPU við innleiðingu hringrásarhagkerfisins. Skrifstofur SORPU munu á sama tíma flytja í sama húsnæði.

Byggja upp klasa fyrir græna geirann

Samhliða þessu hafa eigendur húsnæðisins við Köllunarklettsveg ákveðið að helga fasteignina klasastarfsemi fyrirtækja í græna geiranum á sviðum loftslagsmála, innleiðingu hringrásarhagkerfisins,  sjálfbærni og sambærilegri starfsemi.

Líf Magneudóttir, formaður stjórnar SORPU, segir mikið fagnaðarefni að Góði hirðirinn hafi vaxið fiskur um hrygg að starfsemi hans kalli á stærra húsnæði. „Endurnotkun eins og sú sem Góði hirðirinn stuðlar að er það besta sem við getum gert til að styðja við innleiðingu hringrásarhagkerfis á Íslandi, fyrir utan auðvitað að draga úr neyslu og sóun. Ákvörðun eigenda hússins um að leggja áherslu á starfsemi klasa fyrir græna geirann í húsinu öllu skiptir miklu máli. Þannig skapast grundvöllur fyrir samspil opinberra aðila og einkaaðila, sem er nauðsynlegt til að ná settum markmiðum á sviði hringrásarinnar, loftslagsmála og sjálfbærni.“