6. des. 2017

Endurvinnum álið utanaf sprittkertum og gefum jólaljósum lengra líf

             

Endurvinnsluátakinu „Gefum jólaljósum lengra líf – endurvinnum álið í sprittkertunum“ var ýtt úr
vör í dag þegar Guðmundur Ingi Guðbrandsson, umhverfis- og auðlindaráðherra veitti viðtöku
veggspjaldi sem kynnir átakið.


Tilgangurinn með átakinu er að fá fjölskyldur til að skila álinu utanaf sprittkertum til endurvinnslu og
efla vitund Íslendinga um mikilvægi þess að endurvinna það ál sem fellur til á heimilum og hjá
fyrirtækjum.

Ætla má að á ári hverju séu notuð um 3 milljónir sprittkerta hér á landi. Til að setja hlutina í
samhengi, þá dugar álið úr þremur sprittkertum í eina drykkjardós og einungis þarf þúsund
sprittkerti til að búa til reiðhjól.

Skila má sprittkertum á um 90 endurvinnslu- og móttökustöðum um allt land. Á endurvinnslustöðvum SORPU verða sér tunnur fyrir þetta verkefni fram til 31. janúar, en einnig er hægt að skila málmum í málmagáminn og í gráu tunnuna á höfuðborgarsvæðinu þar sem þeir eru flokkaðir vélrænt frá í móttökustöð SORPU.

Ál hefur þá sérstöðu að það má nýta aftur og aftur án þess að það tapi upprunalegum
eiginleikum sínum. Einungis þarf um 5% af orkunni sem fór upphaflega í að framleiða álið til að
endurvinna það. Það þýðir að mikil verðmæti leysast úr læðingi við endurvinnslu álsins og færir
það stoðir undir rekstur endurvinnslufyrirtækja víða um Evrópu.
Þá dregur orkusparnaðurinn við endurvinnslu áls verulega úr losun gróðurhúsalofttegunda, enda
verður almennt mest losun frá orkuvinnslunni við framleiðslu áls í heiminum.

Álið sem safnast verður pressað hjá Furu og endurunnið hér á landi, en nánar verður tilkynnt um
útfærslu þess þegar söfnunarátakinu lýkur í lok janúar.

Ráðist hefur verið í sambærileg átaksverkefni í Noregi, Finnlandi, Svíþjóð og á Írlandi og er þetta
tilraunaverkefni hér á landi.

Að átakinu standa Endurvinnslan, Fura málmendurvinnsla, Gámaþjónustan, Íslenska
gámafélagið, Málmsteypan Hella, Plastiðjan Bjarg, Samál – Samtök álframleiðenda, Samtök
iðnaðarins og Sorpa.

Átakið hefst miðvikudaginn 6. desember og stendur til 31. janúar næstkomandi.

Upplýsingar um átakið má finna á samal.is/is/endurvinnum-alid og á
facebook.com/endurvinnumalid/.
 

SORPA vill heyra frá þér!

SORPA Gylfaflöt 5, 112 Reykjavík
Sími 520 2200  sorpa@sorpa.is