Sameiginlegir ársfundir SORPU bs., Strætó bs. og Slökkviliðs höfuðborgarsvæðisins bs. og aðalfundur Samtaka sveitarfélaga á höfuðborgarsvæðinu voru haldnir föstudaginn 5. nóvember síðastliðinn.

Á ársfundi SORPU bs. kynnti Alfreð Þorsteinsson, formaður stjórnar SORPU skýrslu stjórnar fyrirtækisins. Í skýrslunni kemur fram að aðildarfélögin endurskoðuðu stofnsamning byggðasamlagsins á fyrri hluta ársins. Endurskoðunin leiddi m.a. í ljós að eigendur töldu ekki ástæðu til að breyta rekstrarformi í hlutafélag. SORPA skuli áfram vera byggðasamlag en heimilt er að mynda hlutafélög um einstaka þætti í starfseminni eins þegar hefur verið gert með dótturfyrirtækjum SORPU, Efnamóttökunni hf. og Metan hf. Veigamesta breytingin við endurskoðun stofnsamningsins varð á skipan stjórnar SORPU. Stjórn byggðasamlagsins er nú skipuð einum fulltrúa frá hverju aðildarsveitarfélagi og skal hann vera aðalmaður í sveitarstjórn eða framkvæmdastjóri sveitarfélags. Stjórnarmenn fara með hlutfallslegt atkvæðavægi í samræmi við íbúafjölda þess sveitarfélags sem þeir eru fulltrúar fyrir. Fram kom að helstu verkefni byggðasamlagsins séu gerð svæðisáætlunar um meðhöndlun úrgangs til næstu 12 ára en það verkefni er nú eitt af skilgreindum verkefnum byggðasamlagsins. Áætlunin tekur mið af lögum um meðhöndlun úrgangs sem gengu í gildi á árinu 2003. Einnig kom fram að framkvæmdastjóra SORPU hefði verið falið að finna leiðir til að lækka kostnað við rekstur endurvinnslustöðva SORPU en sveitarfélögin greiða um 320 milljónir á árinu 2004 vegna reksturs þeirra.
Framkvæmdastjóri SORPU, Ögmundur Einarsson, kynnti rekstraráætlun næsta árs og fjallaði um leiðir til að lækka kostnað vegna endurvinnslustöðva. Þjónustustig endurvinnslustöðva er hátt en stöðvarnar eru opnar alla daga vikunnar. Framkvæmdastjóri benti á að ekki væri æskilegt að fara út í frekari gjaldtöku vegna móttöku úrgangs á stöðvunum en ein leið til að lækka kostnað væri að draga úr þjónustu með því að stytta opnunartíma. Ekki er fyrirsjáanlegt að dragi úr myndun úrgangs í komandi framtíð nema síður sé og því mætti áætla að með slíkri aðgerð væri aðeins verið að flytja til kostnað vegna úrgangsmeðhöndlunar. Kostnaðurinn myndi eftir sem áður lenda á sveitarfélögunum.
Í lögum um meðhöndlun úrgangs frá árinu 2003 kemur meðal annars fram að:

• Sveitarfélögin skulu draga úr myndun úrgangs.
• Sveitarfélögin skulu auka endurnýtingu og endurvinnslu.
• Sveitarfélögin skulu draga úr urðun á lífrænum úrgangi.
• Kostnaður skal vera sýnilegur og hann skal greiddur af þeim sem valda.

Verði þjónustustig endurvinnslustöðva lækkað kann það að vinna gegn þeim markmiðum að dregið verði úr myndun úrgangs og að endurnýting og endurvinnsla verði aukin.
Áhrifaríkasta leiðin til að lækka kostnað sveitarfélaga vegna meðhöndlunar úrgangs er að fjölga flokkum úrgangs sem bera úrvinnslugjald en lög um úrvinnslugjald voru sett í desember 2002. Fram kom að kostnaður sveitarfélaganna væri minnst 100 milljónir vegna förgunar dagblaða og auglýsingapósts sem berst inn um lúgur íbúanna og 50 milljónir vegna förgunar raftækja og kælitækja. Verði úrvinnslugjald lagt á þessa flokka mun Úrvinnslusjóður greiða fyrir söfnun og endurvinnslu þessara úrgangstegunda og kostnaður sveitarfélaganna vegna reksturs endurvinnslustöðva lækka sem því nemur. Þann 15. nóvember munu framkvæmdastjóri og formaður stjórnar SORPU sitja fund með umhverfisráðherra þar sem þessi mál verða til umræðu.

Skýrsla stjórnar SORPU - Alfreð Þorsteinsson
Erindi Ögmundar Einarssonar, framkvæmdastjóra SORPU.