Fötlun af þessu tagi hefur varanleg áhrif á líf einstaklinganna og fjölskyldur þeirra. Markmið félaganna er að styðja við bakið á einstaklingum sem eiga við fötlun vegna þessara sjúkdóma að stríða og aðstandendum þeirra, gæta hagsmuna þeirra innan sem utan sjúkrahúsa og fræða almenning um sjúkdómana. Allt starf sem unnið er á vegum félaganna er unnið í sjálfboðavinnu. Félagsgjöld, sala korta og muna ásamt styrkjum standa straum af daglegum rekstri félagsins.

CP félagið (celebral palsy) er stuðningsfélag þeirra sem eiga við hreyfifötlun að stríða. Hugtakið CP er regnhlífarhugtak notað yfir hreyfihamlanir ýmis konar sem eiga rætur að rekja til heilaskemmda. CP er margskonar fötlun sem spannar allt frá vægri hömlun sem háir einstaklingi ekki í daglegu lífi, til alvarlegrar hreyfifötlunar sem einnig getur fylgt önnur skerðing s.s. þroskahömlun eða önnur fylgifötlun. Meðal meginmarkmiða CP félagsins er að stuðla að fræðslu um CP og skapa vettvang fyrir skoðanaskipti fatlaðra, aðstandenda og fagaðila.

Tourette samtökin eru landssamtök einstaklinga með Tourette heilkenni og fjölskyldna þeirra. Meginmarkmið samtakanna er að standa vörð um hagsmuni Tourette einstaklinga og stuðla að upplýsingamiðlun, þar sem aukinn almennur fróðleikur um Tourette og skilningur á sjúkdómnum er ákaflega mikilvægur fyrir fólk með þennan sjúkdóm.

Góði hirðirinn er rekinn af SORPU í samvinnu við líknarfélög. Endurvinnslustöðvar SORPU sjá um að safna húsbúnaði sem er seldur í gegnum Góða hirðinn, en ágóðinn af sölunni fer allur til líknarmála.
Með þessu fá munir sem hafa óskert notagildi, nýtt hlutverk. Jafnframt njóta líknarfélögin og skjólstæðingar þeirra góðs af ágóðanum og fá einnig sérafslátt í versluninni.